Höfundur: Junko Nakamura

Junko Nakamura (f. 1975) er japanskur Parísarbúi sem skrifar og teiknar barnabækur í algjörum sérflokki. Í morgunsárið er ljúf og ljóðræn saga um herra Bangsa og hundinn hans og geymir í sér látlausa en þarfa áminningu um að hafa ánægju af hinum hversdagslegu undrum tilverunnar.

Hundurinn Lubbi vaknar af nætursvefni og vappar inn í svefnherbergi til herra Bangsa til að ýta við honum. Bangsi er í essinu sínu eftir góðan nætursvefn. Þeir félagar fá sér morgunverð: gómsæt brauðsneið með hunangi veitir herra Bangsa meira að segja innblástur svo að hann seilist eftir minnisbókinni sinni. Á meðan lýsir morgunsólskinið upp eldhúsið og veröldina fyrir utan gluggann. Á morgnana er allt svo fallegt og ferskt, fullt af möguleikum!

Í morgunsárið minnir okkur á að hver nýr dagur er undur og sýnir börnum hversu ljúft það er að eiga sér skemmtilega morgunrútínu. Ef við hefjum daginn ánægð og brosmild aukast líkurnar á því að framhaldið verði gott.

Bókin brýnir líka fyrir okkur að sýna hvert öðru áhuga og virðingu og halda að lokinni góðri morgunstund út í heiminn með opin móttökuskilyrði fyrir öllu því sem veröldin hefur upp á að bjóða.

Junko Nakamura hefur einstakt lag á því að gæða hversdaginn ljóðrænum töfrum og hefur slegið í gegn sem barnabókahöfundur í Frakklandi. Í morgunsárið er ein vinsælasta bók hennar enda einstaklega hugljúf og skreytt frískandi og glaðlegum teikningum.