Höfundar: Elín Edda Pálsdóttir ritstj., Sigþrúður Gunnarsdóttir ritstj

Í ár eru hudrað ár liðin síðan Halldór Laxness hóf ferilinn með útgáfu skáldsögunnar Barn náttúrunnar, þá aðeins sautján ára gamall. Tímarit Máls og menningar fagnar höfundarafmælinu með því að helga bróðurpart þessa heftis Nóbelsskáldinu. Við vonumst jafnvel til að varpa á það nýju ljósi, meðal annars skoðar Ásta Kristín Benediktsdóttir hinseginleikann í Vefaranum mikla frá Kasmír og þátt Laxness í hinsegin bókmenntasögu.

Fyrr á þessu ári efndum við til textasamkeppni meðal menntaskólanema, fæddra á árunum 1999-2003, sem eru því á svipuðum aldri og Laxness var við upphaf ferlisins. Eiríkur Örn Norðdahl rithöfundur tók að sér dómnefndarstörf með okkur ritstjórununum og barst heilmikið af frumlegu, fjölbreyttu og skemmtilegu efni í samkeppnina. Við völdum að endingu ljóð og smásögur eftir sex unga höfunda sem okkur þótti standa upp úr og birtast textar þeirra innan um greinarnar um Laxness.

Snemmsumars urðu svo þau stórtíðindi að nýr vefur Tímaritsins fór í loftið. Þar má finna alla bókadóma sem birst hafa undanfarinn áratug auk heimild um leikhúslíf Íslendinga á þessari öld. Vefurinn kemur ekki í stað prentútgáfu Tímaritsins en þar munu þó birtast valdar greinar og skáldskapur úr nýjum heftum í bland við eldra efni og hvetjum við lesendur því til að fylgjast vel með okkur þar.