Eftir langa sambúð eiga Vilborg og Elías ekki margt sameiginlegt annað en þögnina. Yngri sonur þeirra, Funi, er nýfluttur til þeirra aftur eftir vímuefnameðferð, dóttirin Dagbjört upptekin tveggja barna móðir á framabraut. Frumburðurinn og stóri bróðirinn Danni er hins vegar fjarverandi og samt nálægur; sár og fyrirferðarmikil minning í lífi þeirra allra.

Sorgin hefur ekki sameinað þau heldur sundrað. Síðan Danni hvarf fyrir tuttugu árum hafa þau gengið hvert sína leið, ófær um að rjúfa þögnina og græða sárin, þar til helgina sem óvænt atvik neyðir þau til að horfast í augu og spegla sig hvert í öðru.

Ókunnugt fólk er áhrifamikil og nærgöngul saga um brotna fjölskyldu og óuppgerða fortíð þar sem aðalpersónurnar segja söguna hver frá sínum sjónarhóli – líka Danni, skugginn sem ásækir foreldrana og systkinin dag og nótt.

Björn Halldórsson hefur áður sent frá sér smásagnasafnið Smáglæpi og skáldsöguna Stol sem báðar hlutu góðar viðtökur.