Joachim B. Schmidt er fæddur í Sviss árið 1981, ólst upp á bóndabæ í Ölpunum og lauk námi bæði í tækniteiknun og blaðamennsku. Joachim kom fyrst til Íslands fimmtán ára gamall og tók þá strax ástfóstri við landið. Hann hefur haft fasta búsetu á Íslandi síðan 2007 og verið rithöfundur í fullu starfi síðan 2020. Joachim býr í Reykjavík, er giftur íslenskri konu og eiga þau tvö börn.

Árið 2010 vann Joachim smásagnasamkeppnina Blick am Abend og Thalia "Grosse Sehnsucht Schreiben" með sögunni Stoffel wartet. 2013 kom fyrsta skáldsaga hans, In Küstennähe, út og í kjölfarið tvær skáldsögur enn. Kalmann, sú fyrsta sem kom út á íslensku samhliða þýskunni árið 2020, sló gjörsamlega í gegn hér á landi. Bækurnar um Kalmann urðu síðan tvær, hafa verið þýddar víða og hlotið ýmis verðlaun og viðurkenningar og setið á metsölulistum. Joachim hlaut auk þess bókmenntaverðlaunin Bündner Literaturpreis fyrir Tell, sem kom út árið 2022.

Skáldsögur Joachims gerast flestar á Íslandi og sú nýjasta, Ósmann, er söguleg skáldsaga sem gerist í Skagafirði.