Höfundur: Óskar Magnússon

Nöfnin koma lesandanum strax á bragðið: Það glampar á gullforðann, Oh ho ho, allt fullt af pappír, Kokkur upp á einn og kvart og Mér dugar eitt skot gefa til kynna margvísleg viðfangsefni smásagna Óskars Magnússonar. Þær sýna svipmyndir af fólki sem allir kannast við, í aðstæðum þar sem næmt auga höfundar fyrir hinu skemmtilega og óvenjulega í fari fólks nýtur sín vel. Efnistök Óskars eru fjölbreytt, sumar sögurnar eru bráðfyndnar en í öðrum kveður við alvarlegri tón. Þá sameinar hann stundum skop og alvöru á eftirminnilegan hátt.

Höfundur bókarinnar, Óskar Magnússon, hefur komið víða við í atvinnulífinu, til dæmis sem fréttastjóri og hæstaréttarlögmaður. Undanfarin ár hefur hann verið forstjóri þjóðkunnra stórfyrirtækja, m.a. Hagkaups og Vodafone og nú Tryggingamiðstöðvarinnar. Borðaði ég ekki kvöldmat í gær? er fyrst bók hans (en ekki sú síðasta).