Íslenska söngvabókin er 39 sönglagaflokkur eftir Þorvald Gylfason prófessor við kvæði eftir Kristján Hreinsson skáld og heimspeking. Ljóðin og lögin fjalla um söknuð, sorg og gleði, viljann og vonina, ástina, lífið og listina.

Hallveig Rúnarsdóttir sópran, Elmar Gilbertsson tenór og Snorri Sigfús Birgisson píanó frumfluttu fyrri hluta ljóðaflokksins í Hannesarholti 25. nóvember 2017 (Sextán söngvar fyrir sópran og tenór) og síðari hlutann í Hörpu 27. nóvember 2022 (Sumarferðin).

Þorvaldur Gylfason hefur samið rösklega 140 sönglög, m.a. Sautján sonnettur um heimspeki hjartans, Söngva um svífandi fugla, Sjö sálma, Sextán söngva fyrir sópran og tenór og Sumarferðina við kvæði Kristjáns Hreinssonar. Sonnetturnar voru fluttar í Hörpu 2012 og 2013, Fuglasöngvarnir í Salnum í Kópavogi 2014 og ríkissjónvarpinu 2020 og 2021, sálmarnir í Langholtskirkju 2014 og Guðríðarkirkju 2015, Sextán söngvar í Hannesarholti 2017 og Sumarferðin í Hörpu 2022. Ítalska söngvabókin geymir 24ra laga úrval úr þessum flokkum og var frumflutt í Hannesarholti og síðan á þrem stöðum við Gardavatn á Ítalíu 2022. Eftir Þorvald liggja einnig Fimm árstíðir við kvæði Snorra Hjartarsonar og voru þær frumfluttar í Hannesarholti 2017 og ríkissjónvarpinu 2021 og Hann er eins og vorið, tólf lög við kvæði tólf skálda sem voru frumflutt í Hörpu 2023, auk allmargra kórlaga.

Kristján Hreinsson er skáld og heimspekingur. Hann hefur birt rösklega 80 bækur á prenti, m.a. ljóðabækurnar Vinaljóð (2018), Dagatal (2019), Fimmtíu ljóð um fegurð (2019), Mótmæli (2020) og Ættjarðarljóð (2023) og skáldsöguna Lökin í golunni (2021) auk tíu annarra skáldsagna og hljómdiska þar sem hann flytur eigin lög og ljóð.