Þegar ég var ungur fannst mér eins og ég væri þarna úti í óbyggðunum og upplifði ósnortinn heim náttúrunnar – en þetta var tálsýn. Harmleikur okkar tíma hefur umlukið okkur en án þess að við höfum tekið eftir honum dag frá degi – glötun villtra svæða og líffræðilegs fjölbreytileika á jörðinni.

Ég hef fylgst með þessari hnignun. Líf á okkar jörðu er vitnisburður minn og framtíðarsýn. Hún segir frá okkar mestu mistökum – en er jafnframt vegvísir hvernig hægt er, ef brugðist er við núna, að koma öllu í rétt horf.“

Magnús Þór Hafsteinsson íslenskaði.

Breski sjónvarpsmaðurinn og rithöfundurinn David Attenborough (1926–) er löngu heimsfrægur fyrir náttúrulífsþætti sína í sjónvarpi og bækur um lífríki jarðar. Ferill hans spannar sjötutíu ár. Eftir nám við Cambridge-háskóla og herskyldu í breska sjóhernum starfaði hann lengst af við breska ríkissjónvarpið BBC. Stýrði hann þá meðal annars sjónvarpsrásinni BBC Two. Árið 1973 sneri hann sér alfarið að ritstörfum og gerð náttúrulífsþátta fyrir sjónvarp. Eftir hann liggur fjöldi ógleymanlegra þátta og má segja að í þeim bregði hann upp heildstæðri mynd af öllu dýra- og plöntulífi jarðar. Margt af því efni hefur verið sýnt á Íslandi. Bækur hans hafa einnig notið mikilla vinsælda og komið út hér á landi.