Hér er á ferðinni handhæg bók fyrir alla matgæðinga og annað áhugafólk um sveppi og sveppatínslu. Í bókinni má finna almennan fróðleik um sveppi, nákvæmar lýsingar á um þrjátíu tegundum íslenskra matsveppa og fjölda girnilegra mataruppskrifta sem innihalda sveppi. Hún er því kjörin handbók fyrir þá sem vilja nýta sveppi sér til matar en vantar aðstoð við fyrstu skrefin.

Bókin veitir meðal annars svör við eftirfarandi spurningum:

– Hvar vaxa sveppir og hvenær er best að tína þá?
– Hvaða sveppir eru góðir matsveppir og hverja ber að forðast?
– Hvernig á að meðhöndla og geyma sveppi?

Bókin er í handhægu broti og með plastkápu, hana er því tilvalið að taka með í leiðangra og gönguferðir.

Nú upp úr miðju sumri hefst einmitt hinn eiginlegi sveppatími. Frá miðjum júlí er hægt að tína margar tegundir en sumir sveppir mynda þó ekki aldin sín fyrr en það fer að hausta. Veðurfar hefur áhrif á sveppavöxt og er hlýtt og rakt tíðarfar þeirra óskastundir. Ágætt getur verið að fara í sveppaleit tveimur vikum eftir góða rigningu.

Ása Margrét Ásgrímsdóttir hefur viðað að sér miklum fróðleik um sveppi í gegnum árin og haldið námskeið um sveppatínslu. Hún er annar höfunda bókarinnar Villtir matsveppir á Íslandi sem er löngu uppseld.