Höfundur: Lars Kepler

Paganinisamningurinn er hörkuspennandi glæpasaga sem þegar hefur verið seld til yfir tuttugu landa og var tilnefnd til Sænsku glæpasagnaverðlaunanna 2010. Fyrsta bókin eftir Lars Kepler, Dávaldurinn, kom út á íslensku í fyrra og sló í gegn hér sem annars staðar.

Lík ungrar stúlku finnst í bát sem er á reki í skerjagarðinum utan við Stokkhólm. Hún hefur drukknað – en ekki í sjó. Forstjóri sænska vopnaeftirlitsins finnst hengdur á heimili sínu. Hann virðist hafa framið sjálfsmorð en lögregluforinginn Joona Linna skynjar að eitthvað er öðruvísi en það ætti að vera. Á eyju í skerjagarðinum eru Penelope Fernandez og Björn Almskog á örvæntingarfullum flótta undan kaldrifjuðum byssumanni. Brátt rennur upp fyrir Linna að málin tengjast – og hann verður að finna ungmennin áður en það er um seinan.

Alexandra og Alexander Ahndoril standa á bak við höfundarnafnið Lars Kepler. Fyrsta bókin sem þau skrifuðu saman, Dávaldurinn, náði strax metsölu. Alexandra var áður meðal annars þekkt fyrir að skrifa bókmenntarýni og hafði sent frá sér þrjár skáldsögur. Alexander hafði samið átta skáldsögur og fimmtán leikrit.

Jón Daníelsson þýddi.