Engilbert: Sem bragðaði vín í fyrsta sinn á fermingardaginn og varð dauðadrukkinn og drakk eftir það sleitulaust þegar hann komst yfir vín;  sem var sölumaður af guðs náð og gerðist heildsali upp úr stríði, reif upp peninga og kom sér upp sínum eigin kenningum um það hvernig menn færu að því að koma sér áfram; sem aldrei samkjaftaði heldur spann endalausar frægðarsögur af sjálfum sér úr ferðum sínum vítt og breitt um heiminn.

Engilbert var milljón prósent maður og er aðalpersóna þessarar stórskemmtilegu skáldsögu Ólafs Gunnarssonar. Hún kom fyrst út árið 1978 en nú hefur höfundur snikkað hana til, stytt og lagfært til samræmis við fyrstu gerð hennar.