Áslaug Jónsdóttir

Áslaug Jónsdóttir

Áslaug Jónsdóttir myndskreytir, grafískur hönnuður, rithöfundur og myndlistamaður er fædd árið 1963. Eftir hana liggja tugir bóka auk þess sem hún hefur myndlýst fjölda bóka eftir aðra höfunda, átt framlag í safnritum, bæði texta og myndir, og skrifað leikgerðir af sögum sínum. Þekktustu verk hennar eru bækurnar um litla skrímslið, sem hún skrifar með Kalle Güettler og Rakel Helmsdal, og myndskreytingarnar í Sögunni af bláa hnettinum eftir Andra Snæ Magnason.

Stílhreinar og tjáningarríkar myndir Áslaugar og skemmtilegir textar hafa skilað henni fjölda viðurkenninga. Hún fékk íslensku myndskreytiverðlaunin Dimmalimm tvö ár í röð fyrir Gott kvöld og Nei! Sagði litla skrímslið, Gott kvöld og Stór skrímsli gráta ekki hlutu Barnabókaverðlaun menntaráðs Reykjavíkurborgar, Sagan af bláa hnettinum fékk Barnabókaverðlaun Vestnorræna ráðsins og Skrímsli í vanda fékk Íslensku bókmenntaverðlaunin.

Áslaug hefur þrisvar sinnum verið tilnefnd á heiðurslista alþjóðlegu IBBY-samtakanna og verið tilefnd af Íslands hálfu til Norrænu barnabókaverðlaunanna, Norrænu leikskáldaverðlaunanna, ALMA-verðlaunanna (Astrid Lindgren Memorial Award), H.C. Andersen-verðlaunanna og Verðlauna Norðurlandaráðs. Þá hefur hún hlotið Grímuna, Íslensku leiklistarverðlaunin, viðurkenningu úr Bókasafnssjóði höfunda og Viðurkenningu Barnabókaráðsins, Íslandsdeildar IBBY.