Kristín Ómarsdóttir kom fram á sjónarsviðið árið 1985 þegar hún vann fyrstu verðlaun í samkeppni Þjóðleikhússins fyrir leikritið Draumar á hvolfi. Á þeim fjórum áratugum sem liðnir eru síðan hefur hún sent frá sér ríflega fjörutíu verk, skáldsögur, leikrit, smásögur og ljóð. Hún hefur löngu skipað sér sess sem einn frumlegasti rithöfundur þjóðarinnar.

Kristín hefur hlotið fjölda tilnefninga fyrir verk sín, þar á meðal til Íslensku bókmenntaverðlaunanna og Bókmenntaverðlauna Norðurlandaráðs. Verðlaunin eru líka orðin mörg; hún hefur hlotið Grímuverðlaunin, Maístjörnuna, Fjöruverðlaunin, Menningarverðlaun DV og nú síðast Íslensku bókmenntaverðlaunin fyrir Móðurást – Draumþing, sem er annað bindið af skáldaðri ævisögu langömmu Kristínar á ofanverðri nítjándu öld í Biskupstungum.