Sævar Helgi Bragason, Stjörnu-Sævar, er fæddur í Reykjavík 17. apríl 1984. Hann lauk stúdentsprófi af náttúrufræðibraut frá Flensborgarskólanum í Hafnarfirði og B.Sc. gráðu í jarðfræði frá Háskóla Íslands. Sævar hefur starfað við vísindamiðlun hjá Háskóla Íslands, kennt stjarnvísindi í framhaldsskólum, í Háskóla unga fólksins, Háskólalestinni og Vísindasmiðjunni. Hann er einnig tíður gestur í ýmsum fjölmiðlum þegar rætt er um vísindi og var umsjónarmaður vinsælla þátta um umhverfismál, Hvað höfum við gert?, sem sýndir voru á RÚV.

Sævar hefur hlotið ýmis verðlaun fyrir störf sín. Árið 2014 hlaut hann viðurkenninguna Framúrskarandi ungur Íslendingur og árið 2016 hlaut hann viðurkenningu frá Háskóla Íslands fyrir framúrskarandi vísindamiðlun. Sævar hafði einnig umsjón með einu stærsta vísindamiðlunarverkefni sem ráðist hefur verið í á Íslandi, þegar öllum nemendum og kennurum á Íslandi voru færð sérstök gleraugu til að fylgjast með sólmyrkvanum 20. mars 2015. Árin fyrir almyrkvann yfir Íslandi 12. ágúst 2026 opnaði hann augu margra fyrir því magnaða náttúruundri en sólmyrkvagleraugu fylgdu bók hans Sólmyrkvar (VÍSINDALÆSI 7), sem kom út fyrr á því ári.

Sævar hefur skrifað nokkrar bækur um stjörnufræði og önnur vísindi tengd geimnum, bæði á íslensku og ensku. Árið 2016 sendi hann þjóðina út að skoða stjörnurnar þegar Stjörnuskoðun fyrir alla fjölskylduna kom út og næstu ár komu út bækur um geimverur, svarthol og stjörnuhiminninn yfir Íslandi. Árið 2021 kom út fyrsta VÍSINDALÆSIS-bókin, Sólkerfið, og síðan hafa komið ein til tvær bækur á ári í þeim vinsæla bókaflokki fyrir áhugasama og fróðleiksfúsa krakka. Tvær þeirra, Hamfarir og Kúkur, piss og prump voru tilnefndar til Íslensku bókmenntaverðlaunanna í flokki barnabóka.