Kæri lesandi. Hver hefði trúað því að MÓTOR-KROSS væri svarið við öllum okkar vandamálum?! Hvort sem það er RUGLIÐ í Þór, HRIKALEG vandræði Bellu gellu eða að pabbi GETI EKKI HÆTT að flytja ástarljóð um nak … hérna hér líkama mömmu?? Þetta lagast allt þegar man er komið í gallann, með hjálminn og gleraugun, og gefur allt í botn. Og hver átti hugmyndina að þessu mótor-kross-ÆÐI? Ég! Stella Erlings … já, eða sko … Siggi … og Bella … Ómægod, þið lesið þetta bara sjálf!

Gunnar Helgason þarf vart að kynna fyrir íslenskum börnum, lesendum, öfum og ömmum. Bækurnar hans um Stellu og skrautlega fjölskyldu hennar eru í uppáhaldi hjá þeim öllum, auk þess sem þær eru margverðlaunaðar og stjörnum hlaðnar af hátíðlegum gagnrýnendum. Eftir ófáar ábendingar krakka um allt land um hvaða persóna ætti að vera í fókus í sjöundu bókinni er nú loksins komið að Bellu gellu krossara.