Hjálpræði efnamanns

Gerð ÚtgáfuárSíðurVerðMagn
Innbundin 2002 320 2.990 kr.
spinner

Hjálpræði efnamanns

2.990 kr.

Gerð ÚtgáfuárSíðurVerðMagn
Innbundin 2002 320 2.990 kr.
spinner

Um bókina

Heilagur Klemens frá Alexandríu var einn af hinum svonefndu kirkjufeðrum. Hann starfaði í borginni Alexandríu í Egyptalandi á ofanverðri 2. öld eftir Krist og hafði mikil áhrif á mótun kristinnar trúar með því að flétta fyrstur kristinna manna skipulega saman gríska heimspeki og hina gyðing-kristilegu hugsun. Því er ljóst að menningarsögulegt mikilvægi verka hans er ekki einskorðað við sögu kristninnar heldur snertir það alla sögu evrópskrar hugsunar.

Í Hjálpræði efnamanns fjallar Klemens um dæmisögu Jesú um hinn ríka mann sem sé torveldara að fá inngöngu í himnaríki en úlfalda er að komast í gegnum nálarauga og þau ráð hans til auðugra að gefa fátækum allt sitt. Þetta er raunar fyrsta þekkta rit kristninnar sem fjallar sérstaklega um þetta efni. Túlkun Klemensar er á þá leið að orð Jesú beri ekki að skilja bókstaflega, heldur sem svo að það sé sóknin í auð en ekki eigurnar sjálfar sem hindrar sáluhjálp hins ríka. Veraldlegar eigur eru hlutlaus verkfæri sem má nota til góðs eða ills. Slíkur ytri auður er enda annarlegur og ólíkur hinum innra, „eiginlega“ auði hins dyggðuga manns. Meðferð Klemensar á dæmisögunni, sem fellur í megindráttum undir svokallaða allegóríska túlkun, veitir áhugaverða innsýn í túlkunaraðferðir frumkristninnar en lengi var deilt um hvernig bæri að skilja þessi orð Krists.

Í ljósi þessa skilnings skýrir hann svo hvernig megi læra rétta notkun auðs, hreinsa sál sína og losna undan ástríðum eins og fégræðgi. Siðfræði Klemensar er undir áhrifum frá grískri heimspeki, einkanlega stóuspeki, enda hlaut hann gríska menntun og þekkti vel til heimspeki Platons, Aristótelesar og stóuspekinganna. Hann var þeirrar skoðunar að heimspekin færði manni heim mikilvæga þekkingu á sjálfum sér, heiminum og Guði, þótt hún væri að vísu ekki nema hjálpartæki á vegi mannsins til hjálpræðis.

Þessari veglegu útgáfu Hjálpræðis efnamanns fylgja fjórir viðaukar og ítarleg ritaskrá auk viðamikils inngangs Clarence E. Glad um verk Klemensar, ævi og aðstæður í árdaga kristninnar.

Einnig hefur komið út sem Lærdómsrit fyrsti hluti Fræðarans, eins meginverks Klemensar frá Alexandríu.

Tengdar bækur

INNskráning

Nýskráning