Höfundur: Edda Andrésdóttir

Í öðru landi – Saga úr lífinu (2007) eftir Eddu Andrésdóttur er ljúfsár og lágstemmd frásögn dóttur sem horfir á eftir föður sínum hverfa inn í óminnisland Alzheimers-sjúkdómsins, þaðan sem hann átti ekki afturkvæmt. Hann lést innan við ári eftir að veikindanna varð fyrst vart.

Dóttirin fylgist vanmáttug með þegar faðir hennar missir smátt og smátt tengslin við tilveruna og tími hans fjarar út og um leið finnst henni hún sjálf stödd í öðru landi. Henni verður hugsað til liðinna tíma og hún fer að rifja upp sögu föður síns og fjölskyldunnar, drauma og veruleika íslenskrar alþýðufjölskyldu á seinni hluta síðustu aldar, tíðaranda og minningarbrot frá liðinni tíð. Lítil atvik vekja upp ljúfan ilm minninganna og þrátt fyrir tregann í frásögninni er húmorinn aldrei langt undan.

Í öðru landi er skrifuð frá hjartanu, bók um erfiða reynslu sem jafnframt vekur alla til umhugsunar um tímann og ellina, tilfinningar og samkennd. Við vitum ekki hvað bíður okkar og kannski verður ellin ekki eins og við höfðum hugsað okkur; þess vegna skiptir máli að nýta þær stundir sem við höfum saman.

Edda Andrésdóttir er kunn fjölmiðla- og sjónvarpskona sem áður hefur sent frá sér tvær viðtalsbækur, Á Gljúfrasteini, bók um Auði Laxness, og Auður Eir: Sólin kemur alltaf upp á ný. Hér slær hún nýjan streng og skrifar afar persónulega bók sem byggist alfarið á hennar eigin reynslu.

ATH. Tvær gerðir hljóðbóka eru í boði fyrir þessa vöru. Hljóðbókina má kaupa á geisladiski (CD eða Mp3) sem sendist í pósti eða sem streymishljóðbók (Streymi) sem er afhent rafrænt og hægt er að hlusta á beint í gegnum app Forlagsins eða vafra. Hér má lesa meira um hljóðbækur í streymi.

Hljóðbókin er um 6 klukkustundir í hlustun. Höfundur les.