Kristján litli húkir aleinn á köldu sjúkrahúsi þegar afi birtist með æsispennandi sögu. Hann varð nefnilega eitt sinn sjálfur að leita sér hjálpar á afskekktum spítala vegna afar óvenjulegra veikinda. Á leiðinni þangað rakst hann á fjörulalla, sjóræningja, völundarhús, Lagarfljótsorminn og alls kyns hræðilegar óvættir, og þurfti á allri sinni kænsku að halda til að komast til botns í ráðgátunni um dularfulla erfingjann.

Guðni Líndal Benediktsson sló í gegn með bók sinni Ótrúleg ævintýri afa – Leitin að Blóðey sem hlaut Íslensku barnabókaverðlaunin 2014. Hér tekur hann upp þráðinn sem er enn æsilegri en í fyrri bókinni og spinnur hann eins og þrautþjálfaður sagnamaður.

* * *
„Sögurnar hans afa eru bæði bráðfyndnar og stútfullar af fróðleiksmolum … Eldhresst framhald af ævintýrum afa, stútfullt af húmor og fróðleik.“
Halla Þórlaug Óskarsdóttir / Fréttablaðið

* * *
„Sögurnar hans afa eiga það til að fara um víðan völl, það er eiginlega það sem gerir þær svo skemmtilegar, og áður en varir er Kristján svo hugfanginn af ævintýrinu ægilega að hann gleymir nánast því sem er að gerast á spítalanum í kringum hann og þegar hann man það er afi ekki seinn á sér að hrista enn æsilegri sögur úr erminni.“
Árni Matthíasson / Morgunblaðið

? ? ? ?
„Bráðfyndin saga … sem ætti að höfða bæði til barna og foreldra þeirra.“
HÞÓ/Fréttablaðið
(um Leitin að Blóðey)