„Kannski hefur djöfullinn komið sér fyrir í Mama Anna,“ heyrði ég prestinn hrópa í hátalarakerfi guðsþjónustu safnaðar síns einn laugardagsmorgun. Nokkrum dögum fyrr hafði ég beðið hann um að lækka útsendingarstyrk safnaðarins. Hávaðinn var svo mikill að það glumdi um alla sveit. Íbúar voru orðnir langþreyttir en enginn þorði að kvarta nema ég og þetta var það sem ég uppskar.

Í bók þessari lýsir höfundur reynsluheimi sínum af margra ára tengslum við Tansaníu, tengslum sem hófust á ferðalagi fjölskyldunnar árið 2005.

Fátæktin sem höfundur komst í nálægð við varð henni hvatning til að leggja eitthvað af mörkum til þorps sem fjölskyldan komst í góð kynni við. Fyrirtæki var stofnað sem réði fólk til að byggja upp ferðaþjónustu og grænmetis- og ávaxtaræktun.

Með tíðri viðveru myndaðist traust samband milli höfundar og heimakvenna sem leiddi til stofnunar félagasamtakanna Women Power. Með styrkjum voru haldin námskeið í sjálfseflingu og þróun viðskiptahugmynda sem á þriðja hundrað kvenna úr þorpinu hafa setið. Félagasamtökin Women Power í Bashay reka í dag smálánasjóð kvenna sem stofnsettur var með styrkjum frá Íslandi. Með tilkomu hans hafa margar konur getað lagt grunn að viðskiptahugmyndum og þannig bætt fjárhag heimilanna.