Höfundar: James Patterson, Liza Marklund

Bandaríski lögreglumaðurinn Jacob Kanon ferðast milli evrópskra stórborga í leit að morðingja dóttur sinnar og unnusta hennar. Þau voru myrt í Róm og síðan hafa ung pör í fleiri borgum hlotið sömu örlög.

Áður en voðaverkin eru framin senda morðingjarnir póstkort til blaðamanns á staðnum – og síðar ljósmynd af líkunum. Kanon og sænska blaðakonan Dessie Larsson reyna að finna mynstur í óhugnanlegum raðmorðunum – en tekst þeim að stöðva hryllinginn?

Hér stilla tveir spennusagnameistarar, bandaríski metsöluhöfundurinn James Patterson og sænska glæpasagnadrottningin Liza Marklund, saman strengi sína í fyrsta sinn. Glæpasagnaunnendur þekkja þau bæði af góðu en Patterson er margkrýndur meistari spennusögunnar og selur fleiri bækur á heimsvísu heldur en flestir kollegar hans – þó þeir leggi saman. Marklund er enginn nýgræðingur heldur og verma bækur hennar toppsæti metsölulista víða um heim.

Guðni Kolbeinsson þýddi.