Skáldatími er minningabók Halldórs Laxness frá fimmtán ára tímabili, 1923 til 1937, en er skrifuð löngu seinna, kom fyrst út árið 1963.

Þessi ár milli heimsstyrjalda voru miklir umbrotatímar og einmitt þá var Halldór að mótast sem meiri háttar skáldsagnahöfundur. Hann var á ferð og flugi um veröldina, til vesturs og austurs, út og aftur heim, komst í kynni við alls konar fólk og hugmyndir, hreifst af ólíkum skoðunum og stefnum, tók afstöðu og barðist fyrir því sem hann taldi rétt, með beittan pennann að vopni.

Hér lítur Halldór yfir farinn veg og gerir upp þetta róstusama tímabil þegar sló í brýnu með heilu hugmyndakerfunum og fólk skipaði sér í hatrammar fylkingar. Þegar bókin kom út var hann löngu orðinn víðfrægur og dáður höfundur þrátt fyrir óvinsælar skoðanir og skrif á yngri árum, hann hafði hlotið Nóbelsverðlaun í bókmenntum nokkrum árum fyrr og því vakti þetta uppgjör hans, pólitískt og persónulegt, gríðarlega athygli.