Árni Samúelsson og fjölskylda hans er löngu orðin landsþekkt fyrir rekstur Sambíóanna. Hér segir frá æsku Árna og íþróttaferli, en hann var um tíma landsliðsmaður í handknattleik. Örlögin höguðu því svo að hann, bankastarfsmaðurinn, og eiginkona hans Guðný Ásberg tóku við rekstri Nýja bíós í Keflavík.

Kom þá í ljós að bíóreksturinn átti vel við Árna. Fyrir daga hans var kvikmyndamenningin á Íslandi mjög bágborin og urðu Íslendingar að bíða í allt að þrjú ár áður en vinsælar kvikmyndir voru sýndar. Þetta breyttist allt með tilkomu Bíóhallarinnar í Mjóddinni, en með byggingu hennar lagði fjölskyldan allt undir. Framhaldið þekkja allir. Sigurgeir Orri Sigurgeirsson rithöfundur skrifar bókina sem er hvort tveggja í senn stórmerkileg heimild um bíómenningu Íslendinga og um persónu og athafnasemi Árna og fjölskyldu hans.