Halldór Guðmundsson er fæddur í Reykjavík árið 1956. Hann nam bókmenntafræði við Háskóla Íslands og Kaupmannahafnarháskóla og lauk þaðan mag.art. prófi 1984. Eftir það starfaði hann við bókaútgáfu fram til ársins 2003, lengst af sem útgáfustjóri Máls og menningar. Hann hefur skrifað nokkrar bækur og er þekktust þeirra Halldór Laxness – ævisaga, sem kom út 2004 og hlaut Íslensku bókmenntaverðlaunin í flokki fræðirita. Halldór var forstjóri Hörpu á árunum 2012 til 2017. Hann hefur tvisvar stýrt þátttöku landa í Frankfurt-bókamessunni, fyrst árið 2011 þegar Ísland var heiðursgestur bókamessunnar og íslenskar bókmenntir þar í öndvegi og síðan árið 2019 þegar Noregur var heiðursgestur. Hann hefur verið formaður Þjóðleikhúsráðs frá 2020.