Góði dátinn Svejk er vonlaus hermaður. Hann ber enga virðingu fyrir valdi, gerir aldrei það sem honum er sagt, er gersamlega áhugalaus um að drepa óvini og bullar út í eitt. Ásamt félögum sínum, söfnuði kúnstugra karaktera, er hann fulltrúi litla mannsins í einum fáránlegasta hildarleik 20. aldarinnar, heimsstyrjöldinni fyrri, þegar milljónir ungra manna voru sendar út á vígvöllinn til þess eins að deyja fyrir föðurlandið.

Í þessari drepfyndnu sögu af góða dátanum, sem enginn veit hvort er fífl eða snillingur að leika fífl, tókst Jaroslav Hašek hið ómögulega: að gera stríð hlægilegt.

Ævintýri góða dátans Svejks í heimsstyrjöldinni komu fyrst út í Tékklandi á árunum 1920–23 en Hašek dó úr berklum áður en honum auðnaðist að ljúka verkinu. Þýðing Karls Ísfeld kom fyrir sjónir íslenskra lesenda á árunum 1942–43 og hefur æ síðan verið talin í hópi mestu snilldarþýðinga síðustu aldar.

Einar Kárason ritar formála prentútgáfunnar.

ATH. Tvær gerðir hljóðbóka eru í boði fyrir þessa vöru. Hljóðbókin er til á geisladiski (CD eða Mp3) sem afhendist í pósti eða úr verslun en einnig er hægt að fá hljóðbók sem er afhent rafrænt og hægt er að hlusta á beint í gegnum app Forlagsins eða vafra (Hljóðbók – App). Hér má lesa meira um hljóðbækur fyrir appið.

Hljóðbókin er um 15 klukkustundir að lengd. Gísli Halldórsson les.