Höfundur: Arnaldur Indriðason

Á köldum janúardegi er lögreglan kölluð að blokk í Reykjavík þar sem lík hefur fundist í garðinum. Þetta reynist vera stálpaður drengur, dökkur á hörund sem liggur á grúfu í blóði sínu, frosinn fastur við svellið. Illur grunur kviknar um skelfilegan glæp.

Erlendur, Elínborg og Sigurður Óli hefja rannsókn málsins og utan úr myrkri og hríðarkófi birtast um síðir staðreyndir sem eru jafnvel nöturlegri en vetrarnótt við heimskautsbaug.

Arnaldur Indriðason nýtur hylli víða um lönd fyrir magnaðar og spennandi sögur sínar sem hafa hlotið frábæra dóma og raðað sér á metsölulista stórþjóða. Hér á Íslandi hafa vinsældir hans lengi verið gríðarlegar.

Bækurnar um Erlend Sveinsson rannsóknarlögreglumann eru hér tölusettar eftir innri tímaröð sögunnar, Einvígið: Erlendur #1 gerist árið 1972 en Furðustrandir: Erlendur #14 2005. Útgáfuár bókanna er svo innan sviga.