Enginn hafði nokkurn tímann, fyrir utan gesti útlenskra kvennabúra, séð jafn mörg og falleg brjóst. Brúnar, bleikar, rauðar, vínrauðar, fölar, dimmar, feimnar, stórar, hæverskar, undrandi, litlar, mjóar, stingandi geirvörtur, þykkar, ósýnilegar – stór – lítil – hvorki – hvort tveggja – fullorðin – óorðin – brjóst.

Oddný Þorleifs- og Þuríðardóttir stendur á mörkum barns og konu og rígheldur í bernskuna því hana óar við veröld fullorðnu kvennanna með striti sínu og áþján. En á fimmtánda sumri er henni boðið til Jónsmessugleði þar sem henni opinberast kynngimagnaður og seiðandi kvennaheimur sem dagsdaglega er hulinn á bak við ægivald karlanna.

Kristín Ómarsdóttir heldur hér áfram að segja á sinn næma og einstaka hátt skáldaða sögu langömmu sinnar í Biskupstungum á ofanverðri nítjándu öld. Sagan hófst með bókinni Móðurást: Oddný og fyrir hana hlaut Kristín Fjöruverðlaunin en fyrir þennan annan hluta frásagnarinnar, Móðurást: Draumþing, var hún sæmd Íslensku bókmenntaverðlaununum.

„Sögulegur frásagnagaldur … Hrífandi fíngerður og ljóðrænn glitvefur ofinn af meistara höndum.“ úr umsögn dómnefndar íslensku bókmenntaverðlaunanna 2024