Þessi bók hefur að geyma frásagnir af eftirminnilegum atburðum og skemmtilegu fólki sem tengist Akranesi og Borgarfirði. Brugðið er upp myndum af lífi fólks í leik og starfi. Lýst átökum þess við óblíða náttúru og harðsnúin yfirvöld.

Sagt er frá fyrstu áætlunarferðum á Faxaflóa. Birt er frásögn af störfum sjómannskonu á Akranesi og frásagnir af frækilegum björgunarafrekum í Faxaflóa og á Borgarfirði. Sagt er frá dvöl Hjalta Björnssonar í Danmörku og Þýskalandi á stríðsárunum, heimferð með þýskum kafbáti og síðan fangavist í Bretlandi. Þáttur af Pétri Hoffmann og síðustu sjóferð hans. Þá eru minningar og sagnir frá náttúruperlunum Akrafjalli og Elínarhöfða. Þáttur um Báruhúsið, gamanvísna- og revíuhöfundinn Theódór Einarsson, skemmtikraftana og EF-kvintettinn. Þættirnir í bókinni voru fluttir í Ríkisútvarpinu haustið 1997 undir heitinu „Blöndukúturinn“. Vegna óska fjölmargra hlustenda var ákveðið að birta þá í bókarformi og nú í hljóðbókaformi. Heiti þáttanna gefa hugmynd um fjölbreytt efni bókarinnar:

– Fylgt úr hlaði
– Íslendingur undir hæl nasista
– Störf sjómannskonunnar og frækileg björgun í Faxaflóa
– Hoffmannshús og örlög Péturs Hoffmanns
– Stórhuga bjartsýnismaður í Borgarfirði og örlög hans
– Lífið á skútunum og lokaferð Hafmeyjunnar
– Notkun hverahitans og fyrstu rafljósin í Borgarfirði
– Giftusamleg björgun á Borgarfirði
– Hrakningar í beitufjöru og síðasti fátækraflutningur á Akranesi
– Náttúruperlan Akrafjall
– Elínarhöfði
– „Í Báruhúsi hér ég brosandi fer“

Höfundur bókarinnar, Bragi Þórðarson útgefandi, hefur áður sent frá sér bókaflokkana Borgfirsk blanda I-VIII, Sagnir og fróðleikur úr Mýra- og Borgarfjarðarsýslum, og Lífsreynsla I-III, frásagnir af eftirminnilegri og sérstæðri reynslu.

ATH. Hljóðbókin er afhent rafrænt og hægt er að hlusta á hana beint í gegnum app Forlagsins eða vafra. Hér má lesa meira um hljóðbækur fyrir appið.

Hljóðbókin er um 7 klukkustundir að lengd. Höfundur les.