10 umsagnir um Ból

1. embla – 15. febrúar 2024

   „Líklega gæti sæmilega athugull lesandi borið kennsl á stíl Steinunnar Sigurðardóttur utan úr geimnum, þekkt hennar texta úr öllum heimsins textum, svo sérstakur er hann og fágaður, í honum hæfilegur skammtur af skensi og smá stælum, kaldhæðni, kímni og orðaleikjum.“
   Þórunn Hrefna / Bókmenntavefurinn

2. embla – 2. febrúar 2024

   „Ból er efnismikil saga þrátt fyrir að bókin sé ekki ýkja löng. Viðfangsefnið er ástin í öllum sínum fjölbreyttu myndum, en líka missir, tengsl og tengslaleysi, hvort sem er við sjálfa sig eða aðra, umhverfi sitt og náttúru. Ferðalag söguhetjunnar rammar inn frásögnina sem um leið verður innri ferð hennar og uppgjör við lífið. Það er margt sem kraumar undir, líkt og í náttúrunni sem býr sig undir að gjósa, en ferðinni er heitið heim í unaðsreit fjölskyldunnar, Ból, sem er um það bil að verða náttúruöflunum að bráð. Steinunn vefur blæbrigðaríkan textavef sem heldur lesandanum föngnum allt frá upphafi, sagan snertir við honum og tilfinningarnar malla lengi eftir að lestrinum lýkur. Hið ósagða er oft jafn afhjúpandi og það sem sagt er og, líkt og í fyrri verkum Steinunnar, er leikandi írónía í bland við myndríka ljóðrænu einkennismerki textans. Þótt Ból sé að vissu leyti heimsendasaga ræður fegurðin för og það er hún sem situr fastast eftir.“
   Umsögn dómnefndar Íslensku bókmenntaverðlaunanna

3. embla – 4. desember 2023

   „Margslungin, þétt og spennandi örlagasaga. Djúpri sorg og söknuði er lýst af einstakri næmni og listfengi. Persónusköpunin er einkar vel heppnuð og tengingu manns og náttúru gerð skil á athyglisverðan hátt. Ólgandi tilfinningar persóna eiga sér samhljóm í náttúruöflunum þegar sár leyndarmál koma í ljós.“
   Umsögn dómnefndar Íslensku bókmenntaverðlaunanna

4. embla – 23. nóvember 2023

   

   „Ból er magnað verk um þann vanda að vera manneskja. Sagan kallast við ýmis fyrri verk Steinunnar en heldur þó sjálfstæði sínu vel á þeim vettvangi.“
   Kristján Jóhann Jónsson / Morgunblaðið

5. embla – 9. nóvember 2023

   „Í Bóli birtist söguheimur Steinunnar eins og hann gerist bestur þótt hér hafi verið lögð áhersla á þemur á borð við sorg og leyndarmál má ekki gleyma að aðall Steinunnar Sigurðardóttur eru náttúrulýsingar, kaldhæðinn húmor og sterkar persónulýsingar. Allt þetta setur svip á Ból og ekki síst þess vegna er bókin yndislestur frá upphafi til enda um leið og frásögnin snertir ýmsa viðkvæma strengi á meistaralegan hátt.“
   Soffía Auður Birgisdóttir / Víðsjá

6. embla – 6. nóvember 2023

   “Allt svo vel gert, uppbygging, mál, ljóðræna, persónur, ástin. Hörkubók og falleg.”
   Jón Bjarni Atlason

7. embla – 6. nóvember 2023

   “Hrein lestrarunun.”
   Halldóra Jónsdóttir

8. embla – 6. nóvember 2023

   “Búin að lesa Bólið sem er rafmögnuð bók frá fyrstu síðu, um allt sem máli skiptir í bókmenntum, ást og missi, líf og dauða. Mjög Steinunnarleg en þó svo ný, það er kafað svo djúpt í allt sem fyrir manneskjur getur komið”
   Þórhildur Ólafsdóttir

9. embla – 6. nóvember 2023

   “Vá, mögnuð bókin hennar Steinunnar.

   Vel sköpuð aðalpersóna og fyndin, sem er svo þakklátt, og svo grét ég líka, sem er nú ekki eitthvað sem gerist mjög oft hjá mér við bókalestur.

   Áhrifarík, marglaga og karftmikil. Textinn býr yfir krafti sem smitar í allar áttir, allt frá nístandi sorginni og missinum yfir í inspírasjón um máttinn í hinu hversdagslega.”
   Anna Hafþórsdóttir, Rithöfundur

10. embla – 6. nóvember 2023

    “Ból er sannkallað meistaraverk. Enn á ný hefur Steinunni tekist að skapa magnaða og ógleymanlega kvenpersónu sem er engri lík.”
    Guðrún Steinþórsdóttir

Lesa fleiri umsagnir