Tíminn, Höfuðskepnan
ekki samur
stormar ekki lengur striklotuna
svo það stirnir á makkann
í eilífðar bláljósi fjallsins.

Höktir nú sköllóttur út á hlið
í vaxandi skugga fjallsins
í eilífu rökkri landsins
dægravillt gamalmenni.

Dimmumót er áhrifamikil bók, þrungin sterkum og óvæntum náttúrumyndum. Frá björtum sjónarhóli barnsins sem heillast af hvítu eilífðarfjalli liggur leiðin til óvissu og umbreytinga samtímans. Stórbrotin og sláandi ástarjátning til lands og jökuls.

Steinunn Sigurðardóttir er eitt af höfuðskáldum okkar og hefur alla tíð verið í beinu og brýnu samtali við líðandi stund í skáldskap sínum og skrifum. Dimmumót er tíunda ljóðabók hennar.

Steinunn Sigurðardóttir fagnar á árinu 2019 hálfrar aldar höfundarafmæli en fyrsta bók hennar, Sífellur, kom út 1969, þegar hún var aðeins nítján ára. Steinunn hefur sent frá sér jöfnum höndum skáldsögur og ljóð. Hún hefur einnig samið leikverk, smásögur og tvær sannsögur, um Vigdísi Finnbogadóttur og Heiðu fjalldalabónda. Verk hennar hafa notið mikilla vinsælda og hún hefur hlotið ýmsar viðurkenningar fyrir ritstörf, meðal annars Verðlaun Jónasar Hallgrímssonar árið 2014. Árið 1995 fékk hún Íslensku bókmenntaverðlaunin fyrir skáldsöguna Hjartastað. Bækur hennar hafa lengi verið gefnar út víða í Evrópu við góðar undirtektir og í Frakklandi var gerð kvikmynd eftir þekktustu skáldsögu hennar, Tímaþjófnum.

ATH. Hljóðbókin er afhent rafrænt og hægt er að hlusta á hana beint í gegnum app Forlagsins eða vafra. Hér má lesa meira um hljóðbækur fyrir appið.

Hljóðbókin er 55 mínútur að lengd. Höfundur les.

Hér má hlusta á brot úr fyrsta kafla hljóðbókarinnar: