Höfundur: Guðni Th. Jóhannesson

EGILL HELGASON: Þannig að þú telur ekki nokkra hættu á því að bankar eins og þinn gætu riðað til falls?
LÁRUS WELDING: Alls ekki.

Eldar loga við Alþingishúsið, taktur búsáhaldabyltingarinnar berst út í vetrarnóttina. „Hvernig lentum við eiginlega hér?“ spyr hnípin þjóð á Austurvelli.

Hrunið: Ísland á barmi gjaldþrots og upplausnar er fyrsta heildaryfirlitið yfir íslenska efnahagshrunið og eftirmál þess – allt frá því að óveðursský lánsfjárkreppu tóku að hrannast upp erlendis og þar til ríkisstjórnin fór frá völdum.

Guðni Th. Jóhannesson sagnfræðingur hefur viðað að sér einstökum heimildum um það sem átti sér stað þessa örlagaríku daga. Í bókinni eru áður óbirtir tölvupóstar, símtöl og minnisblöð sem Guðni fléttar saman af miklum hagleik svo úr verður áhrifamikill og sannfærandi spegill lygilegra atburða á líðandi stundu.

„Þið ráðið ekki dagskránni í mínum húsum!“
Davíð Oddsson við fulltrúa Alþjóðagjaldeyrissjóðsins á fundi í Seðlabankanum.

„Við í Samfylkingunni munum ekki sætta okkur við það að [Davíð Oddsson] sitji við stjóra og útdeili skensi og skömmum. Þess vegna verður hann að fara.“
Tölvupóstur Ingibjargar Sólrúnar Gísladóttur til Geirs H. Haarde og Össurar Skarphéðinssonar.

„Við munum grípa til frekari aðgerða gegn íslenskum stjórnvöldum eins og þörf krefur til þess að ná fjármunum til baka.“
Gordon Brown, forsætisráðherra Bretlands.