Markmiðin með bókinni byggja á þremur meginþáttum:
• að ná utan um hugmyndafræði sjálfbærrar þróunar og virkja umhverfisvæna hugsun í verki og tengja sjálfbærni í textíl við sjálfbæran lífsstíl,
• að auka skilning almennings á sjálfbærri þróun og ábyrgri neyslu og finna leiðir til að lengja endingartíma fatnaðar og annarra textílafurða með því að endurhugsa og endurnota og jafnvel skapa eitthvað alveg nýtt,
• að hafa bókina innihaldsríka, einfalda að gerð og heimaunna en sú nálgun kallast einnig á við innihald bókarinnar; heimaunnin verkefni með áherslu á einfaldar aðferðir þar sem hvatt er til sjálfbærrar hugsunar, sköpunar, nývirkni og nýsköpunar með endurnýtingu að leiðarljósi.
Á undanförnum árum, sérstaklega eftir að Heimsmarkmið Sameinuðu þjóðanna um sjálfbæra þróun voru innleidd, er enn meiri þörf á þátttöku almennings í aðgerðum gegn umhverfismengun. Markmiðið með bókinni er að ná utan um þá þætti sem textílgreinin hefur upp á að bjóða í slíkum aðgerðum. Í tengingunni – neysla, nýting og nýsköpun – er áhersla lögð á að greina vandann og öðlast reynslu og þekkingu til að takast á við nývirkni og nýsköpun í leitinni að lausnum gegn sóun og mengun frá textílheiminum. Textílgreinin er fjölbreytt vegna þeirra ólíku aðferða sem heyra þar undir og hver aðferð fyrir sig býður upp á óendanlega fjölbreytni og verkefnaval. Í bókinni kallast ólíkar textílaðferðir á við mismunandi verkefni sem nálgast má með einföldum aðgerðum sem allir geta tileinkað sér og unnið að heima við á bæði persónulegan og skapandi hátt. Textílaðferðirnar eru útskýrðar með einföldum og skýrum teikningum sem studdar eru með stuttum skýringartextum og ítarlegum textaleiðbeiningum.
Verkefnið er styrkt af umhverfis- og auðlindaráðuneytinu, Kennslumálasjóði Háskóla Íslands, Hagþenki – félagi höfunda fræðirita og kennslugagna og Miðstöð íslenskra bókmennta. Einnig hefur formaður Neytendasamtakanna og stjórn Félags textílkennara í grunnskólum veitt verkinu umsögn.