Úngur eg var er þriðja í röðinni af fjórum samstæðum minningasögum sem Halldór Laxness skrifaði á áttræðisaldri um æsku sína fram til tvítugs. Bókin kom upphaflega út árið 1976.

Ungskáldið Halldór var bráðþroska og eftir skamma menntaskólavist sigldi hann af landi brott sautján ára gamall, rétt í þann mund sem fyrsta skáldsaga hans kom út. Leiðin lá til Danmerkur og síðar Svíþjóðar og hér segir frá kynnum hans af borgum og borgarlífi, skáldum og spakvitringum, einkum í Kaupmannahöfn. Hann setur sig ekki úr færi að kynnast nýju fólki og stöðum og hughrifin sem fylgja verða honum efniviður í skáldskap.

Minningasögurnar fjórar eru: Í túninu heima, Sjömeistarasagan, Úngur eg var og Grikklandsárið.