Vetrarferðin er þriðji hluti þríleiks Ólafs Gunnarssonar sem hófst með Tröllakirkju (1992), en þessar þrjár sjálfstæðu skáldsögur fjalla á tengdan hátt um líf íslensdinga á ofanverðri tuttugustu öldinni. Hér er sögusviðið Reykjavík á stríðsárunum og eins og í fyrri bókum Ólafs er fléttaður margbrotinn þráður kringum grundvallarspurningar mannlegar tilveru þar sem fjöldinn allur af lifandi persónum kemur við sögu – tekst á, elskast og hatast. Tvær persónur gnæfa þó upp úr: veitingakonan Sigrún sem bæði veitist allt sem hún þráir og er svipt öllu því dýrmætasta sem hún á, og nautnaseggurinn Kristján G. sem í einu og öllu lætur stjórnast af hömlulausum hvötum sínum.

Þetta er kynngimögnuð frásögn, spennandi, hröð og dramatísk, hlaðin þeim krafti sem jafnan einkennir verk Ólafs Gunnarssonar.