Sjömeistarasagan er önnur í röðinni af fjórum samstæðum minningasögum sem Halldór Laxness skrifaði á áttræðisaldri um æsku sína fram til tvítugs. Bókin kom upphaflega út árið 1978.

Hér er sögusviðið Reykjavík í lok fyrri heimsstyrjaldar. Halldór hafði komið ofan úr Mosfellssveit til að leggja stund á fagrar listir en er nú að hefja nám við Menntaskólann í Reykjavík. Um leið er hann að ljúka við fyrstu skáldsögu sína, Barn náttúrunnar, og skólavistin verður endaslepp. Dregin er upp lífleg mynd af býsna óvanalegum ungum manni og hugarheimi hans, samferðafólki og umhverfi, skemmtunum og vinafundum.

Minningasögurnar fjórar eru: Í túninu heima, Sjömeistarasagan, Ungur eg var og Grikklandsárið.