Höfundar: Niklas Natt och Dag, Hilmar Hilmarsson þýddi

Á myrkri haustnótt árið 1793 dregur vaktarinn Mickel Cardell karlmannslík upp úr forarpolli í Stokkhólmi. Það er skelfilega leikið – hvorki með hendur né fætur en gróið fyrir stúfana. Einhver hefur haldið manninum föngnum og aflimað hann smátt og smátt.

Cardell og berklaveiki lögfræðingurinn Cecil Winge hefja leit að hinum seka og komast brátt að því að undirferli, mannvonsku og kvalalosta er ekki aðeins að finna í aumustu hreysum borgarinnar heldur einnig á bak við glæstar framhliðar stórhýsanna. En tíminn er naumur …

Saman við þetta fléttast nöturleg frásögn ungs spjátrungs á hraðri leið til glötunar og saklausrar stúlku sem örlögin hafa hrakið út á ystu nöf.

1793 er fyrsta skáldsaga Niklas Natt och Dag, sem er af ævafornri sænskri aðalsætt, og hlaut hún verðlaun Sænsku glæpasagnasamtakanna sem besta frumraunin 2017. Útgáfuréttur að bókinni hefur verið seldur til yfir þrjátíu landa.

Hilmar Hilmarsson þýddi.