Það er vor í litlum bæ við sjóinn. Atvinna er stopul og unga fólkið dreymir um bjartari tíma. En þegar stríðið kemur í bæinn, sjálf heimsstyrjöldin, breytist allt. Göturnar fyllast af erlendum hermönnum, braggar rísa, dansinn dunar og bæjarbúar þurfa vegabréf til að komast á milli hverfa. Úti á firði liggja herskip og yfir vofir ógnin: Flugvélar með sprengjur sem enginn veit hvar falla.

Yfir bænum heima segir frá stórfjölskyldu á Seyðisfirði, nágrönnum og heimilisvinum. Ásta er fimmtán ára þegar ófriðurinn hefst og spennt fyrir nýjungum. Þrúða systir hennar á ung börn og er undir miklu álagi í starfi sínu á Símstöðinni. Rúna móðir þeirra tekur öllu af æðruleysi en heimilisfaðirinn Snjólfur er andsnúinn hernum þótt nú hafi þau nóg að bíta og brenna. Hver kynslóð bregst við með sínum hætti og milli heimafólks og aðkomumanna kviknar smám saman vinátta og væntumþykja – en styrjöldin, lífsháskinn og umrótið í bænum marka djúp spor.

Kristín Steinsdóttir hefur einstakt lag á að skapa trúverðugar og skemmtilegar sögupersónur og skrifar af hlýju og næmni um örlög þeirra og daglegt líf. Kristín er geysivinsæll verðlaunahöfundur og bækur hennar hafa hlotið mikið lof heima og erlendis.

Kristín Steinsdóttir hefur sent frá sér yfir þrjátíu bækur, birt sögur í safnritum og samið leikrit fyrir útvarp og svið. Hún hefur meðal annars hlotið Íslensku barnabókaverðlaunin, Norrænu barnabókaverðlaunin og Sögustein fyrir barnabækur sínar en fyrir skáldsögur ætlaðar fullorðnum hefur hún verið tilnefnd til Bókmenntaverðlauna Norðurlandaráðs, fengið Menningarverðlaun DV og Fjöruverðlaunin tvisvar. Verk hennar hafa komið út á Norðurlöndunum, í Þýskalandi og víðar.

ATH. Hljóðbókin er afhent rafrænt og hægt er að hlusta á hana beint í gegnum app Forlagsins eða vafra. Hér má lesa meira um hljóðbækur fyrir appið.

Hljóðbókin er um 8 klukkustundir að lengd. Höfundur les.